سياسة الخصوصية

آخر تحديث: 27 أكتوبر 2026

سهلة خدمة توصيل بعربيات وسواقين تابعين لسهلة. السياسة دي بتشرح إيه البيانات اللي بناخدها في تطبيق سهلة للركاب وتطبيق سهلة فليت للسواقين، وليه، ومين بيشوفها، وقد إيه بنحتفظ بيها.

البيانات اللي بناخدها

من الراكب

• رقم الموبايل: عشان تدخل بكود بيوصلك على واتساب أو رسالة SMS.
• الاسم واللغة: عشان السواق يعرف يناديك والتطبيق يكلمك باللغة اللي تختارها.
• مكانك وقت ما بتطلب رحلة: بنستخدم موقع الموبايل وإنت فاتح التطبيق بس، عشان نحدد مكان الركوب. مش بنتابع مكانك في الخلفية.
• الرحلات: مكان الركوب والنزول، السعر، الوقت، السواق والعربية، ومسار العربية أثناء الرحلة.
• الأماكن المحفوظة (البيت والشغل وغيرهم) لو حفظتها.
• رقم طوارئ لو ضفته، عشان نبعتله لينك متابعة الرحلة لو دوست على زرار الطوارئ.
• التقييمات اللي بتديها وبتاخدها.
• بيانات الجهاز للإشعارات: كود الإشعارات ونوع الموبايل، عشان نبعتلك حالة الرحلة.

من السواق

• الاسم ورقم الموبايل وكود السواق.
• الموقع وهو في الوردية، حتى والتطبيق في الخلفية، عشان نوصله بالركاب القريبين ونوري الراكب العربية جاية فين. بنوقف تتبع الموقع أول ما الوردية تخلص.
• الورديات، الرحلات، الفلوس اللي اتحصلت والتسليم، والتقييمات.

بنستخدمها في إيه

• نوصل الراكب بأقرب عربية، نحسب السعر قبل الحجز، ونوري الطرفين حالة الرحلة.
• الأمان: لينك متابعة الرحلة للأهل، زرار الطوارئ، ومراجعة الشكاوى.
• الحسابات: فلوس الورديات والتسليم.
• تحسين الخدمة: مواعيد التشغيل، الأسعار، وأماكن العربيات.

مش بنبيع بياناتك، ومش بنستخدمها في إعلانات.

مين بيشوف بياناتك

• أثناء الرحلة بس: الراكب بيشوف اسم السواق الأول وصورته والعربية ومكانها، والسواق بيشوف اسم الراكب الأول ومكان الركوب والنزول. زرار الاتصال في التطبيق بيطلب رقم الطرف التاني، فرقمك بيظهر للي بتكلمه.
• لينك المتابعة: اللي تبعتله اللينك بيشوف العربية ومكانها لحد ما الرحلة تخلص، وبعدها اللينك بيقفل.
• فريق سهلة: كل واحد على قد شغله (التشغيل، خدمة العملاء، الحسابات)، وكل تعديل بيتسجل.
• شركات بنستعين بيها: Supabase (قاعدة البيانات، في ألمانيا)، سيرفر التطبيق (في أوروبا)، Meta (واتساب) وشركة الرسائل لإرسال كود الدخول، Expo وGoogle لإرسال الإشعارات، وOpenFreeMap لصور الخريطة. كل واحدة بتاخد اللي محتاجاه بس عشان تقدم الخدمة.
• الجهات الرسمية لو القانون طلب كده.

قد إيه بنحتفظ بيها

• مسار العربية أثناء الرحلة: بيتمسح بعد 12 شهر.
• بيانات الرحلات (المكان والسعر والوقت): بنحتفظ بيها للحسابات والشكاوى.
• لما تمسح حسابك: بنمسح اسمك ورقمك وأماكنك المحفوظة ورقم الطوارئ وبيانات الإشعارات على طول. الرحلات القديمة بتفضل من غير اسم ولا رقم، عشان الحسابات.

حقوقك

من حقك تعرف إيه البيانات اللي عندنا عنك، وتصحح اسمك، وتمسح حسابك. تقدر تمسح الحساب من التطبيق (حسابي ← امسح حسابي) أو من صفحة مسح الحساب. بنتعامل مع بياناتك حسب قانون حماية البيانات الشخصية المصري رقم 151 لسنة 2020.

السن

الخدمة لِلي سنهم 18 سنة أو أكبر. اللي أصغر من كده يركب مع حد كبير مسؤول عنه.

الأمان

البيانات بتتنقل مشفرة، والوصول ليها محدود بالصلاحيات، والسعر بيتحسب على السيرفر بس. مفيش نظام آمن 100%، فلو لاحظت حاجة غريبة كلمنا على طول.

التغييرات

لو غيرنا السياسة دي هنكتب التاريخ الجديد هنا، ولو التغيير كبير هنبلغك في التطبيق.

تواصل معانا

سهلة، كفر الدوار، البحيرة، مصر. ابعتلنا على support@sahla.website أو من "المساعدة والأمان" في التطبيق.